Angel Locsin

BILANG Darna ng bagong henerasyon, hind na nga mabubura ang pangalan ni Angel Locsin sa history, tumanda man siya at mawala sa showbiz, mananatili ang pangalan niya bilang isa sa pinakaseksing gumanap na Darna. At bilang Darna, siya ang may pinakamahabang exposure sa lahat ng mga gumanap bilang Pinay superhero dahil hindi ang ito basta pelikula na ilang oras mo lang mapapanood, isa itong telefantasya na napapanood mula Lunes hanggang Biyernes na aabot ng kung ilang buwan o taon.

Dahil na rin sa teleserye niyang Darna , kinumpirma namin kay Angel ang chika na Dennis Trillo raw ang pinakapaborito niyang leading man, gaano katotoo ito?

“Actually, lahat naman ay okay sa akin, wala namang point of comparison kasi kanya-kanya naman sila ng characters at lahat sila, enjoy naman akong makatrabaho. It's just that, si Dennis, sobrang tahimik, parang curious akong malaman ang pagiging shy niya kaya madalas kapag nasa taping panay ang kausap ko sa kanya. ‘Tsaka before pa naman nakatrabaho ko na siya sa Love to Love at Mulawin , may bonding na rin kami kaya gustung-gusto kong kinukulit siya.”

Kung sakaling ligawan siya ni Dennis at nagkataon namang libre siya, ano ba ang tsansan sa kanya ng aktor?

“Honestly, hindi mahirap gustuhin si Dennis. ‘Yung tipo niya, ‘yun ang hinahanap ng mga babae. Responsible at very cool. Kung pagmamasdan mo siya, tipong parang wala kang magiging problema sa kanya. Kaya lang, may mga bagay na mahirap ipaliwanag kung wala ka sa posisyon, ‘di ba? Kung sakaling ligawan niya ako? Ay! Ha-ha-ha! Hindi ko ma-imagine, kasi friends talaga kami at hindi ko binibigyan ng kahulugan ‘yung mga sweetness niya sa akin. Pero if ever, lets give him the chance, ‘di ba?” sabay tawa ng malakas ni Angel na aliw na aliw sa tanong namin.

Sa dami ng gustong manligaw sa kanya ngayon, ano pa ba ang hinahanap niya sa isang lalaki?

“Simpleng tao lang naman ako. Simpleng lalaki at totoo sa sarili. Hindi sa akin importante ang looks niya, basta mahal ko at naniniwala ako na siya ang lalaki para sa akin. Mararamdaman mo naman ‘yun!” pangiti-ngiting sabi pa ng dalaga sa amin.

Ano naman ang masasabi niya na made na siya ngayon bilang artista?

“Sobrang happy. Lahat ng babaeng artista ay nangarap na matamo ito, although para sa akin marami pa akong dapat patunayan sa sarili ko. Marami pa akong gustong makamit at gustong marating. Sana lang huwag akong pabayaan ng mga fans ko. Kung nasaan man ako ngayon, higit sa lahat sila ang pinagkakautangan ko ng loob, kung hindi sa suporta nila, wala ako ngayon sa kinalalagyan ko!” very proud na sabi pa ni Angel sa amin.

Dennis Trillo

KINIKILALA si Dennis Trillo sa halos lahat ng award giving bodies sa taong ito dahil sa kanyang ipinamalas na galing sa pag-arte sa pelikulang Aishite Imasu . Kaya naman, sobrang saya niya dahil sa hiningi niyang blessings sa Panginoon, sobra-sobra ang ibinigay sa kanya kaya walang dahilan para magreklamo pa siya sa mga nangyayari sa kanya ngayon.